Konekte Tout Ayisyen

Konekte tout ayisyen ansanm se yon priyorite pou MODDEPA. Nou konnen gen anpil ayisyen konsekan ki gen anpil konesans ak eksperyans ki renmen Ayiti a 100%. Nou konnen gen anpil ayisyen ki bouke wè peyi yo damou anpil viv tounen yon jeng. Nou rann nou kont rezon ki tout gran ayisyen sa yo pa kapab transfòme Ayiti se paske nou pa konekte. 

Menn si gen yon milyon ayisyen ki gen anpil konesans ak mwayen, sa pa ase. Nou bezwen yon platfòm pou nou chita epi idantifye tout resous nou genyen ak sa nou manke pou nou kapab mete peyi nou an sou modènizasyon ak devlopman sosyoekonomik. Nou konsidere konsidere tout ayisyen konpetan sa yo tank yon gwoup jwè pwofesyonèl, men yo pa genyen ekip kote pou yo antrene ansanm, apre sa pou yo antre nan chanpyona a. Nan sans sa a, ekip la se òganizasyon soyal oubyen politik ki gen kapasite avèk mwayen pou pèmèt chak grenn ayisyen devlope talan yo, epi mete konesans yo osèvis peyi a.

Premye etap, n ap kreye kondisyon pou nou konekte avèk ayisyen k ap vivt oupatou nan mond lan. Pandan n ap konekte youn ak lòt, n ap kòmanse yon dyalòg pou nou wè ki sa nou ka fè ansanm pou nou sove Ayiti ki se eritaj zansèt nou yo kite pou nou.

Dezyèm etap la se jwenn yon platfòm pou nou kontinye dyalòg sou Ayiti paske nou pi bon mwayen pou kontinye konekte. Lè nou kontinye pale youn avèk lòt sou platfòm na va chwazi a, n ap envite anpil lòt moun pou yo vin patisipe nan brase lide ansanm. Koulye a, teknoloji pèmèt nou reyini, travay ansanm, kèlkeswa kote n ap viv nan mond lan. Sa vle di, koulye a, nou pa gen distans ki separe nou; espesyalman lè nou gen yon trezò tankou Ayi ti. Nou ka kite Ayiti, men nou pa kapab retire Ayiti nan kè nou.

3èm etap la, n ap pran inisyativ pou yon fòme yon fòme òganizasyon oubyen yon mouvman politik kote n ap akouche yon vizyon ansanm;  n ap etabli yon misyon ak objetik pou  Ayiti pou 50 an. Sa vle di n ap kreye yon mouvman k ap kontinye ekziste jenerasyon apre jenerasyon. Pou nou kòman, n ap bezwen 100 moun ki se poto mitan mouvman politik nou an; 100 moun ki remen Ayiti avèk pasyon; 100 moun ki vle travay pou Ayiti dekole a 100%. Se sou Ekip 100% pou Ayiti a, tout mouvman an ap apiye l. Sa vle di 100 moun sa ap gen anpil responsablite sou tèt yo. Avèk teknoloji nou genyen koulye, konekte avèk lòt ayisyen se yon bagay ki trè fasil.

4è etap la se kote n ap pran angajman pou nou konpòte nou tankou manman ak papa mouvman sa a oubyen tankou anj gadyen li. Sa vle di n ap bay tan nou, konesans, resous materyèl nou genyen, lajan nan pòch; epi n ap ankouraje Ayisyen tankou etranje pou yo bay kout men yo kapab pou nou ka rive atenn tout objektif mouvman an. Avèk resous nou ranmase nan men moun ki nan Ekip la ansanm ak lòt moun ki enterese ak mouvman an, n ap mete tout baz nou bezwen pou nou kòmanse fonksyone toupatou ann Ayiti e aletranje

5è m etap la, n ap prepare yon kongrè nasyonal kote n ap vote epi chwazi tout moun ki pral gen responsablite pou dirije gran mouvman sa a. Kòm nou te di l deja, mouvman politik nou vle bay Ayiti pap gen ni mèt, ni chèf. Se yon estriki ki chita sou modèl konbit oubyen travay ann ekip. Nou renmen di se yon lidèchip kolektif kote tout moun ki gen yon responsablite nan mouvman an kapab patisipe nan tout desizyon ak ekzekisyon aktivite yo. Se kongrè k ap bay chak moun reponsablite yo selon kapasite ak disponiblite yo.